"সবনর ধনপুদি"
 নূতন ধন চাকমা।

চাঙমা জাদর রীধি- সুদোমে,
রাঙা হাদি, হালা পিনোন
পিনোজ তুই হুব মন দ্বি।
তুই অলে ম্' অাগোজোর,
সবনর ধনপুদি।

হ্'রিনো ধ্ক চোক্কুন তর,
হোগিলো ধ্ক তর 'র'।
ত্ রবো শুনিলেও চিত জুরায়,
ওই যান যানে 'ভ'।
তুই,
রাঙা বিলি রাঙা নয়,
হালা বিলি নয়,
স্বর্গপুরী পুরি মেলা ধ্ক,
তুজিম পুরো দোল।
তরে দেলে
হারোচ্ছ্যা্, গাবুজ্জ্যা্, বুড়ো মরদে,
বেগে ওই যান ওলো-ঝোল।
রুবে-রঙে, অাজনে-মাদনে,
চরনে-গরনে তুজিম পুরো,
হন্ উনে নেয়।
ত' লগ সমারী অবার চান বেগে্,
জীঙকানির নিজেনী মন্ সুগে
গোঙয়েয় নিবাত্ত্যা্য়।
বুগোদ অাঝলি, হানদ ঝুঙগো,
ঠেঙঅ্দ ঠেঙ হারু যক্ক্যা্ পিনিবে।
হমর্'দ হা্দ দ্বি চেয় তেবার মনে হয়,
মনে হ্য় যেন হ্'ন পুরী মিলে।
ত্ লগে হদা্ হলেও
ম্ মনদ স্বর্গ সুখ পুদে।
হা্জার মন্ দুগ থেলেও যানে,
হ্'ন দুগ মনদ ন্ উদে।
তুই অলেদে স্বর্গর পুরী,
জুলি জুলি থাজ।
মন্ সুগে তাজ তুই,
হাররে্ বেলে, রাগ রাগ,
গজাঙ গজাঙ ন্ দেগাজ।
তুই ম্'র সবনর ধনপুদি,
তত্থ্যা্য় জনম মর।
হা্জার বজর ধুরি ত্ অাজায় মুই,
জীঙকানির নিজেনী গোঙয়েয় নিবার
তিরোজ গরঙঅর।
তরে ফেলে
এ জীঙকানিদ মুই,
মন্ সুগোদ থেম।
জনম জনম তরে মুই,
হোচ পেয় পেয় যেম।
রিজে-রিচ্ছে, হিঙসে-পিজুম,
জীবনদ মুই ন্ গুরিম।
জীঙকানির নিজেনী সুগে-শান্তিয়ে যেবার,
জনমভর ত্ হদায় মুই চলিম।
তুই অলে ম্'র
সবনর ধনপুদি।
পিলেঙ তুলো এত্তন তরে,
এবার অভে তুই ম্'র লগ সমারী।
নূতন ধন চাকমা।
পুর-৩০.১১.২০১৯ইং।